Plenária PN la konsege hakotu Polémika Rejime Espesiál UNTL 2019

Ohin oron 26 fulan fevereiru tinan 2019, Parlamenetu Nasioál konvoka plenária hodi konvida Ministru Ensinu Superiór ho Magnifiku Reitór Universidade Nacional Timór Lorosa’e (UNTL) atu klarifika konabá dezentendimentu iha proseu simu estudante-foun ne’ebé asesu atravéz kanál B rejime espesiál.

Iha plenária, meza Parlamentu nasionál ne’ebé prezide hosi Prezidente Parlamentu en-ezersísiu Sr. Maria Angelina Lopes Sarmento hodi halo abertura no fó kedan oportunidade ba bankada interpelante hodi husu ba parte governu nomeadamenetu Ministru Ensinu Superiór Sr. Longinhos dos Santos no Magnifiku Reitor UNTL Sr. Francisco Miguel Martins relasiona ho polémika no dezentensimentu konabá númeru estudante-foun rejime espesiál 6700 resin ne’ebé parte rua la konsege deside hamutuk. Iha intervensaun, deputadu sira kestina sobre prosedimentu/rekezitu, atribuisaun vaga rejime espesiál liga-ba kondisaun no fasilidade universidade nian atu akomoda no mós fundamentu kontradisaun entre parte Ministériu tutela no UNTL.

Intervensaun hosi deputadu sira no resposta hosi parte Ministru Ensinu Superiór ho Magnifiku Reitór UNTL ne’ebé fahe ba sesaun dader no lorokraik. Iha resposta ne’e Sr. Ministru kontinua kaer ba manuál rejime espesiál 15% ho vaga 400 resin, enkuantu hosi Reitór UNTL konsidera polítika-sosiál hodi responde ba preokupasaun no interesse veteranu no povu ki’ak nian oan sira ne’ebé konsege tama ona iha lista rejime espesiál, tanba sira merese duni atu hetan edukasaun iha nível tersiáriu, liliu universidade estatal ne’ebé selu ho propinas barata. Diskusaun iha plenária loron tomak la iha solusaun eh desizaun ruma hosi Parlamentu Nasionál. Infelizmente Sr Ministru Ensinu Superiór kontinua mantem pozisaun no promete sei la halo mudança ba númeru vaga rejime espesiál, hosi parte UNTL nia reitor haktuir “UNTL la soi atu kous ida riba seluk no hakoak ida tebe seluk” signifika katak pozisaun universidade nian entre espada-parede (simu hotu eh anula hotu) nune’e bele hamenus problema. 

Taba plenária Parlamentu Nasionál la halo desizaun ba polémika refere, mak enkamiña ba parte Ministério Ensinu Superór no UNTL hamutuk ho Sekretáriu Estadu Veteranu atu túr hamutuk hodi buka solusaun no di’ak liután lori ba aprezenta hodi deside iha reuniaun Konsellu Ministru.